به گزارش خبرگزاری مهاجر، اداره مهاجرت، پناهندگان و شهروندی کانادا با انتشار بیانیهای رسمی، نگرانی عمیق خود را نسبت به گزارشهای مربوط به اخراج مهاجران افغانستانی از تاجیکستان اعلام کرد. این نهاد دولتی تأکید کرده است که با همکاری سازمان بینالمللی مهاجرت (IOM) و کمیساریای عالی پناهندگان سازمان ملل متحد (UNHCR)، در تلاش است تا از امنیت و حمایت شهروندان افغانستانی که قرار است در کانادا اسکان داده شوند، اطمینان حاصل کند.
این هشدار در شرایطی مطرح شده که حدود ۳۰۰۰ مهاجر افغان در تاجیکستان، تحت حمایت مالی دولت کانادا، در انتظار بررسی پروندههای پناهندگی خود هستند و اکنون با دستور اخراج از سوی دولت تاجیکستان مواجهاند.
یکی از این مهاجران، بیبی خاتون یعقوبی، زن ۵۷ سالهای است که پس از آسیبدیدگی شدید در جریان ضرب و شتم توسط نیروهای طالبان در کابل، به تاجیکستان پناه برده است. فرزند وی، نورالله حاکمی، که شهروند کانادا است، از دولت فدرال خواسته است روند مهاجرت مادرش را تسریع کند تا جان او در برابر خطر بازگرداندن اجباری محفوظ بماند.
رفیع فردوس، عضو شورای افغانستان-کانادا، نیز با اشاره به وضعیت بحرانی مهاجران افغان در تاجیکستان، خواستار اولویتدهی به بررسی پروندههای این افراد شده است.
در همین زمینه، هلن تیبو، دانشیار علوم سیاسی در دانشگاه نظربایف قزاقستان، اظهار داشته که تصمیم تاجیکستان ممکن است تحت تأثیر فشارهای سیاسی و اقتصادی منطقهای و الگوبرداری از سیاستهای کشورهایی چون روسیه باشد. وی افزود: «تاجیکستان معمولاً در سیاستهای منطقهای از روسیه پیروی میکند، بهویژه زمانی که روسیه طالبان را بهعنوان حاکمان مشروع افغانستان به رسمیت شناخته است».
